Iste ye o texto que hue de maitins hemos presentau en a nuestra rueda de prensa d’a campanya en remeranza d’os 20 anyos de movimiento chovenil aragonés que feremos iste anyo con charradas, borinas exposicions y muitas cosas mas.
Ta leyer-lo en castellán puncha asti o en a seccion de Textos.
20 anyadas de movimiento chovenil aragonés: O millor homenache, continar a luita
«…aquí ye una d’as fainas d’a choventut: empentar, dirichir con l’eixemplo a producción d’o hombre de maitin. Y en ista producción, en ista dirección, ye comprendida la producción de si mesmos…»
Che Guevara
1992. En o contexto d’a cucha mundial remataba de desintegrar-se a referencia sovietica, o Muro heba dixau d’existir y Cuba entraba en o periodo especial. Se refincaba l’Estau d’o bienestar en o Reino d’Espanya y Fukuyama proclamaba a os cuatro vientos o fin d’a historia y o fin d’as ideolochías. O socialismo dixaba d’existir como alternativa politica y o neoliberalismo se proclamaba como a unica solución posible, que guaranciaba a igualdat social y a libertat individual. Os democratas tornaban a ganar as eleccions de l’imperio estadounidense con Bill Clinton debant, lo que pareixeba amostrar que no existiba alternativa social a o clamau capitalismo de rostro humano. A cucha mundial dentraba en crisi debant d’o aparentement consolidau neoliberalismo.
Estioron anyos, en l’Aragón d’o recient enguerau decenio d’os 90, de refincación d’un prochecto politico que se creyeba maduro, encara que dimpues o tiempo, os enfrontinamientos y procesos politicos, amostroron que encara quedaba muito por caminar. Os 90, consolidoron un prochecto politico nacional aragonés que naixió en a segunda mitat d’os anyos 80, Unión Aragonesista/Chunta Aragonesista, fundada por aquells hereus de l’Asamblea Autonomista Aragonesa, d’o Movimiento Nacionalista Aragonés y del PSA. Dezaga quedon atros prochectos que asumíban o discurso nacional en os suyos planteyamientos politicos como lo Movimiento Comunista d’Aragón, Nueva Izquierda de Aragón, el PTA, u a Choben Guardia Roya.
En 1992, con Chunta Aragonesista asentada en o panorama politico aragonés, naixió en o suyo seno Chobenalla Aragonesista, a organización chovenil d’o partiu. Fue l’anyo d’as manifestacions multitudinarias por l’autonomía en Zaragoza y en Madrid. A coyuntura social de reivindicación nacional aragonesa yera la propicia t’o surchimiento d’una organización chovenil que por aquell inte se planteyó como a organización aglutinadora d’a choventut aragonesista de cuchas.
Plegon as noticias arredol d’o terrorismo d’Estau d’os GAL, as reformas laborals d’o PSOE con o beneplacito d’os suyos sindicatos, a decadencia y a falta de perspectiva d’una cucha estatal que heba perdiu o norte. O prochecto aragonesista creixeba, se feba más fuerte, pos yera un prochecto amplo, plural, democratico, choven e ilusionant ta toda la población desencantada. Yera un prochecto an adquiriba importancia a choventut, as luitas por o territorio, por a insemisión, as luitas dende as asambleyas en os vicos y en os movimientos socials, en os lugars d’Aragón.
O prochecto politico chovenil maduraba mientres s’asentaba a dreita y se cernían menazas ecolochicas y socials desastrosas t’o pueblo aragonés, pos planeyaba o pantasma d’o PHN y d’o entibo de l’Ebro. En ista baralla, Chobenalla Aragonesista desempenyó un papel alazetal en a organización y movilización d’a choventut. Os suyos lemas lo dixaban esclatero: «Si bebes augua de Yesa, beberás sangre d’o Pirineu».
Chobenalla fue creixendo, madurando, tant que surchioron atras trazas d’entender a practica politica. Surchió Luita, una escisión a la cucha de Chobenalla, u en l’ambito autonomo, do l’acción dreita cobra mayor importancia, Estricalla. Surchió tamién en a base d’os movimientos socials zaragozanos A Enrestida, y d’ista saliba Estrela Negra. Mientres, Chobenalla creyó a organización d’estudiants, UCA, como ferramienta d’intervención en a vida universitaria.
O 2004 estio un anyo d’inflexión t’o conchunto d’o movimiento chovenil aragonés. O partiu matriz de Chobenalla, Chunta Aragonesista, ixe prochecto choven y ilusionant de principios de os 90, heba dentrau en un proceso de decadencia politica, d’abandono d’os movimientos sociale, d’acomodamiento en os suyos nuevos sillons d’o Concello de Zaragoza, de deriva neoliberal en os suyos planteyamientos, que facion imposible a convivencia d’una organización, que en a suya VI Asambleya Nacional s’heba declarau revolucionaria y independentista, con un partiu reformista, cobardement federalista y socialdemocrata.
Asinas, o partiu no aceptó os resultaus d’a soberana VI asambleya nacional de Chobenalla y procedió mediante metodos vergonyosos y antidemocraticos a la expulsión en bloque d’a organización chovenil.
Prencipió alavez, no nomas a mayor campanya de solidaridat y refirme a Chobenalla por parti d’organizacions y personas, soque se plantaron os alazets d’un prochecto politico netament socialista y independentista. A pesar de que 2004 y 2005 estioron anyos d’una actividat politica frenetica, Chobenalla ando cuatro anyadas a la deriva, en os que bi habio escisions y abandonos de militants que apostaban por dar o trango de construcción nacional difuera de Chunta Aragonesista. Atros, a gran parti, apostoron por continar dica l’Asambleya Nacional d’o partidu d’o 2008. En ixa asambleya Chobenalla Aragonesista estio reconoixida por o conchunto d’a militancia de base d’o partiu como a organización chovenil de Chunta Aragonesista. No obstante, Chobenalla como organización autonoma teneba que ratificar ixa virtual reintegración en o partido. Y asinas se facio en l’Asambleya de 2008 d’Andorra. Chobenalla decidió desvinclar-se definitivament de Chunta Aragonesista y apostar por atras vías de fer politica. A dignidat no yera compatible con l’oportunismo.
Chobenalla apostó, chunto a atras organizaciones, por a creyación d’a coordinadera d’organizacions independentistas, o Bloque Independentista de Cuchas. En o suyo seno se treballó, se denunció, s’apostó por levar adebant iste prochecto, que con o tiempo s’ha convertiu en a referencia d’o socialismo y o independentismo aragonés.
Con paciencia, virtut revolucionaria, codherencia y dignidat Chobenalla se mantenio en piet, no sin guaires dificultatz, tensions politicas y personals dentro d’o conchunto d’a choventut aragonesa que hue, contemplado tot lo proceso con perspectiva politica, han rematau afortunadament desapareixendo.
En l’actualidat s’ha escomencipiau a construyir, s’ha construyiu un prochecto politico chovenil serio, revolucionario, clarament independentista y socialista. L’actual organización chovenil d’a Cucha Independentista, Purna-A Chovenalla Revolucionaria y Independentista, ye o resultau d’a unidat organica d’as dos organizacions chovenils que surchion dreita y indreitament d’o proceso de decadencia politica de Chunta Aragonesista, Chobenalla y Astral.
En o 2010, as dos organizacions deciden levar a cabo lo proceso de confluyencia y unidat, pos yera absurdo caminar por sendas diferents quan o planteyamiento politico, a estratechia y a ideolochía yeran similars. Asinas pues, as dos organizacions deciden fundar baixo los alazets d’a independencia y o socialismo, una organización unitaria, autonoma y soberana, an se pueda organizar a choventut aragonesa conscient y compromesa con o suyo pueblo y a suya clase. Surche pues, en febrero de 2010 Purna como o referent chovenil d’a cucha independentista aragonesa.
En l’actualidat, 2012, se cumplen 20 anyos d’a primera asambleya nacional de Chobenalla Aragonesista, y 10 anyos d’a fundación d’Unibersidá Coleutibo Aragonesista. Por ello, dende Purna-ACRI queremos celebrar, no a modo de conmemoración superflua, soque de aprendizache, esmo y experiencia politica, istos 20 anyos que han serviu ta fer madurar a o movimiento chovenil aragonés, ta situar-nos a la cabeza d’a choventudt aragonesa organizada.
Tenemos una chicorrona experiencia politica acumulada, pero somos conscients de que nos queda muito por andar, por recorrer, pos rematamos de naixer. Han estau 20 anyos de resistencia, de conflictos, de dignidat, de luita en a carrera, en as capitals y en o meyo rural, de participación en os movimientos socials, de esfensa d’a nuestra identidat como pueblo, de esfensa d’a tierra, d’internacionalismo, d’apuesta por a luenga y a cultura popular. Han estau nomás 20 anyos, que en o ciclo d’a historia, d’a luita de clases, d’a historia centenaria d’o nuestro país, apenas representan cosa, pero que en o nuestro aprendizache vital como suchetos politicos han suposau una gran experiencia colectiva acumulada, en ista especie de revolución permanent, ta plegar a estar a cheneración que, partindo d’os nuestros antigos companyers que apostoron por a creyación d’un prochecto chovenil aragonesista, ha estau a que ha puesto os alazets d’o primer prochecto chovenil netament independentista y socialista.
20 anyadas d’experiencias y intervención en a luita chovenil que celebraremos durante tot lo 2012 a travies de conferencias, exposicions, rufiertas y actos por tot lo territorio nacional. Con tot y con ixo animamos a la sociedat aragonesa a que participe d’ista parti d’a historia, que participe d’iste lau d’a barricada, d’ista resistencia que nos ferá vencer.
Choven, organiza-te y luita.
INDEPENDENCIA Y SOCIALISMO.
Purna 