Presentación campanya 20 anyos: 12, 13 y 14 d’abril

O pasau cabo de semana estio a presentación d’a Campanya d’os 20 anyos de luita chovenil aragonesa que Purna presentemos con una gran cantidat d’actos, ista vegada, en Zaragoza y Uesca.

As nuestras actividatz escomencipion o chueves 12 con a presentación a las 21:00 en A Flama d’a exposición con materials graficos historicos d’as organizacions chovenils aragonesas que en istos zaguers 20 anyos han luitau por una transformación social y de bella traza han estau vincladas a o nuestro movimiento. Dimpués, a las 21:30 prencipió lo concierto que organizabanos en o bar El Refugio del Crápula, un recital de poesía con Aitor Cuervo y Pablo Hasél que presentaban en Zaragoza o suyo poemario conchunto que arroclo arredol d’una centena de personas. Estio un acto reivindicativo con poesía revolucionaria an tamién i habio bella improvisación de rap combativo.

O viernes 13, tamién aintro d’as chornadas de presentación d’a campanya d’os 20 anyadas de luita chovenil, organizanos un concierto en o CSO Kike Mur con as collas Enatizo (Binefar) y Sobieht (Euskal Herria) a o que s’amanon, alto u baixo, cien personas. Escomencipió a las 22:00 y entre as actuacions d’istas collas se facio un acto politico y se prochectó un vídeo feito ta l’acto. A ixo d’as 24:00, continón as actividatz con una audición combativa, tamién en o centro okupau, d’a man d’os dj’s Aló Residente! y Gus Gusino.

Estio lo sabado quan prencipió reyalment a campanya ya que se facio a primera charrada en Uesca a las 19:00 y que contó con arredol de cuarenta asistents. En ella se repasoron os 20 anyos de luita chovenil fendo un recorriu historico por a existencia de Chobenalla Aragonesista y o suyo camin dica la confluyencia y constitución d’o movimiento independentista como lo conoixemos actualment. Os ponents, militants historicos de Chobenalla, supioron valurar o papel que chugó a organización en iste proceso a o mesmo tiempo que remeraban a suya andadura politica. Dimpués, arredol d’as 22:00 prencipió o concierto que Purna-Uesca i heba organizau de nuevo con Pablo Hasél y Aitor Cuervo en a Sala Edén d’ista ciudat y que de nuevo arroclo a un numero important de personas.

Queremos agradeixer a todas y totz os que han contribuyiu a quitar adebant totz istos actos. A os poetas Aitor Cuervo y Pablo Hasél por levar a flama d’a revolución en l’artistico, t’a Asambleya d’o CSO Kike Mur por dixar-nos o suyo espacio t’o nuestro concierto, a as collas Sobieht y Enatizo por as grans actuacions que levoron a cabo, a o tecnico de soniu por posibilitar o concierto, a os ponents por a magnifica charrada que facion en Uesca y a toda la chent que s’amano a os nuestros actos participando con a suya presencia.

Concierto Pablo Hasél día 12

Concierto Sobieht y Enatizo día 13

Actos en Uesca día 14:

Tenemos fotos y bells vídeos de todas as actividatz pero como han estau muitas as que hemos organizau iste cabo de semana encara no hemos podiu replegar-ie todas, asinas que iremos penchandolas malas que as vaigamos replegando-ie. Por agora tos dixamos istas poquetas (as iremos penchando todas en a sección de fotos):