QUI SOMOS
En o 2004 s’ubriba una crebadura dentro de l’aragonesismo de cuchas. Chobenalla sería forachitada d’o suyo partiu mai, Chunta Aragonesista, en una deciisión antidemocratica d’os suyos mainates. Fruito d’os procesos y camins que yera prenendo lo partiu en ixe inte surtión voces disidents que no refirmaban o chiro enta o reformismo institucionalizau, l’abandono d’a carrera, as asambleyas, y a negación enta proposas esferents arredol d’a cuestión nacional, como l’independentismo socialista, que i yera meso en valura por bells sectors dentro d’o mesmo partiu.
D’ixos sectors bi habió, tamién, abandonos, baixas y expulsións. Estau Aragonés sería una consecuencia d’ello. Chunto a Estau Aragonés se formaría Astral, a suya mozardalla, que tamién crebarian con o partiu por esferencias politicas y estratechicas.
Con tot y con ixo, dentro d’a choventut independentista de cuchas se trobaban dos organizacions, con identicos obchetibos, estratechias y ideyario politico que compartiban o mesmo espacio social. Por ixo, tarde u luego yera menester un proceso de confluyencia y chunta d’ambas organizacions.
Iste surte, ha surtiu, no como punto de chunta d’Astral y Chobenalla, que tamién, si no, como l’organización de toda la choventut independentista aragonesa autonoma a ixas dos organizacions, que naixe de l’asambleyarismo y que quiere, como choventut revolucionaria, treballadera y transformadora, enantar chunto a la resta d’organizacions chirmanas components d’o Bloque Independentista de Cuchas enta un país libre, enta un socialismo fiador d’a nuestra independencia como pueblo
O sabado 20 de febrero de 2010 nos constituyimos en asambleya como organización baixo lo nombre de PURNA – A CHOVENALLA REVOLUCIONARIA Y INDEPENDENTISTA. En dita asambleya, aprobamos os nuestros estatutos y ponencia politica y marcamos as linias a seguir en o nuestro esfuerzo colectivo ta creyar conciencia nacional en o seno d’a clase traballadera aragonesa, asinas como espardir l’independentismo revolucionario como lo camín que creyemos adecuau ta l’avance enta una sociedat chusta y igualitaria, de reparto d’a riqueza social, an que os pueblos y treballadors sigan os suyos artifices y no os vasallos d’Estaus y patrons.
Aprobamos en asambleya bells frents de luita en os que enantar; luita estudiantil y cultural, obrera y sindical, esfensa d’a tierra, feminismo y antipatriarcau y internacionalismo, refusando asinas os organos de participación que a democracia burguesa ufre enta la choventut que no son si no lechitimadors d’a desigualdat.
L’acto asambleyario remató con a participación de companyers d’UCA, o nuestro frent estudiantil, SOA frent sindical, y BIC, referent politico y organizativo.
Enta la independencia y o socialismo pues, meyant a reflexión y l’acción politica, aprendendo a practicar a resistencia, ta maitín foter-le trucazos a o sistema capitalista y a l’estau espanyol. Enantar ta fer posible la irrupción d’o posible en o reyal. Enta la liberación social y nacional.
Dende aquí femos a la vegada una crida a toda la choventut aragonesa independentista y revolucionaria a participar en iste proyecto que plega de naixer, ta que a choventut aragonesa siga una referencia en a luita internacional contra o sistema capitalista y os estaus burgueses.
INDEPENDENCIA Y SOCIALISMO.
